Vrou in hotelkamer verkrag
2011-11-21 11:08
Durban – 'n Vrou is in haar kamer by die Blue Marlin-hotel in Durban aangeval nadat sy deur vyf mans beroof is, berig The Witness.
Die aanval op dié vrou het vyf ure ná 'n voorval by 'n ander hotel in die gebied plaasgevind.
Die vrou is omstreeks 04:00 Vrydagoggend in haar kamer by die Blue Marlin-hotel aangeval.
"Die 30-jarige vrou het geslaap en is wakker gemaak deur 'n man wat deur die badkamervenster geklim het," het lt.kol. Zandra Wiid, polisiewoordvoerder, gesê.
Die inbreker het toe die kamerdeur oopgemaak en sy vier makkers ingelaat. Hulle het toe die slagoffer se selfoon, kontant en bankkaart geëis.
"Vier mans het na die OTM gegaan en die ander man het by die slagoffer in die hotelkamer gebly. Hy het haar toe verkrag," het Wiid gesê.
Die Blue Marlin-hotel sê hy het 24-uur sekuriteit op die perseel.
Malthee Singh, hotelbestuurder, het gesê sy kan nie bevestig hoe die mans toegang tot die hotel verkry het nie.
"Daar word beweer dat hulle in die hotel was, so ek kan nie nou daarop kommentaar lewer nie."
In die tweede voorval het 'n 31-jarige vrou en haar vyfjarige seun van Braamfontein in Johannesburg in hul kamer by die Cutty Sark-hotel geslaap toe 'n groep mans in die kamer kom. Dié hotel is 2 km ver van die Blue Marlin-hotel.
Wiid het gesê die vrou het aan die slaap geraak terwyl sy TV gekyk het.
"Sy het omstreeks 23:00 Donderdagaand wakker geskrik en die mans in haar kamer gevind."
Die mans het haar selfoon, bankkaart en kontant gesteel en gevlug.
"Gelukkig is sy en die kind nie tydens die rooftog seergemaak nie," het Wiid gesê.
Die vrou het haar bank se hulplyn gebel om die kaart te stop.
"Daar is aan die vrou gesê 'n poging is gemaak om geld uit haar rekening te onttrek, maar gelukkig het die transaksie nie deurgegaan nie."
Die polisie het tydens die ondersoek vasgestel dat die groep mans eers 'n sekuriteitswag by die hotel se hoofhek aangehou het en daarna 'n ontvangsdame en 'n kelnerin.
Peter Renwick, hotelbestuurder, het gesê in die stadium is die besonderhede oor die voorval nie duidelik nie.
"Die polisie ondersoek die saak en dit lyk asof daar dieselfde tyd 'n paar voorvalle in die gebied was. Gelukkig is niemand beseer nie, maar ons personeel en gaste is getraumatiseer."
– Volg Nuus24 op Twitter
- SAPA
