Vrou in hegtenis oor bomdreigement

2012-05-31 19:00

Johannesburg – ‘n Vrou is Donderdag by haar huis in Randburg in hegtenis geneem nadat sy na bewering ‘n vals bomdreigement gemaak het, het die polisie gesê.

Die 49-jarige vrou het luidens berigte Woensdag die dreigement gemaak omdat sy nie wou gehad het haar dogter moet aan boord van ‘n 1Time-vlug van Johannesburg na George klim nie.

Sy is Donderdagmiddag in hegtenis geneem en sal na verwagting Vrydag in die Kempton Park-landdroshof verskyn, het kapt. Dennis Adriao gesê.

“Ons neem sulke vals oproepe ernstig op,” het hy gesê.

The Star het Donderdag berig dat die vliegtuig deur beamptes deursoek is toe dit in George geland het. Dit het tot vlugvertragings gelei.

Die polisie se bomeenheid is ook ingestuur om na ‘n bom te soek, maar niks is gevind nie, het sers. Nigel Olifant, woordvoerder van die Wes-Kaapse polisie, aan die koerant gesê.

- Volg Nuus24 op Twitter
 

- SAPA