Vrou glo deur mediese naald in steen gesteek
2010-01-20 08:15
Molly Green
Welkom – Gebruikte mediese naalde in bakstene van Maximus Bricks, een van die onwettige stortingsterreine vir mediese afval in Welkom, het daartoe gelei dat ’n vrou nou mediese behandeling moet kry nadat sy in een van dié naalde getrap het.
Marietjie de Wet moet inspuitings teen hepatitis B en tetanis kry. De Wet en haar man, Basie, oorweeg ’n eis teen Maximus Bricks en die eienaar, Gavin Brasher.
Brasher het reeds aanspreeklikheid aanvaar vir die storting van tonne mediese afval by Maximus Bricks, die skouterrein in die stad en by ’n wildplaas en uitgewerkte goudmyn hier.
Die drama het begin toe De Wet (29) van Handlestraat 7, Riebeeckstad, by haar swembad in ’n naald getrap het. Die plaveiselstene wat by Maximus gekoop is, het begin verbrokkel. Toe van die bakstene oopgekap is, is nog naalde gevind. Haar prokureur, me. Karen Preller van die prokureursfirma Preller Ingelyf, sê sy sal vir drie maande voorkomende inspuitings moet kry.
Haar dogtertjie Rhonë se vyfde verjaardag is ’n later by die swembad gehou. As voorsorgmaatreël dat van die kinders nie ook in naalde trap nie, het De Wet ’n laken oor die plaveisel getrek om vas te stel of daar nie gevaarlike naalde uitsteek nie. Drie van die stene wat oopgebreek is, het naalde in.
Die De Wets oorweeg dit om ’n eis in stel vir die swak gehalte van die stene en vir mediese koste.
Hannes Peyper, wat namens Brasher van Maximus Bricks optree, sê hulle sal aanvoer dat daar geen naalde in dié maatskappy se bakstene is nie. “Naalde kan nie die steenmaakproses oorleef nie.”
Tonne mediese afval is in Desember 2009 op verskillende plekke in en om Welkom gevind.
Brasher het verantwoordelikheid aanvaar vir die storting van die afval van die maatskappy Wasteman. Hy het erken dat hy die storting teen betaling gedoen het. Hy is nog nie formeel deur die Groen Skerpioene aangekla nie.
Opruiming van die stortingsterreine behoort binnekort te begin.
- Volksblad