Vrou gevonnis oor beseerde hond
2012-02-09 19:11
Johannesburg – ‘n Vrou van Krugersdorp, Johannesburg is Donderdag ‘n opgeskorte tronkvonnis opgelê nadat sy nie mediese bystand vir haar beseerde hond gekry het nie.
Antoinette van Wyk is tot 12 maande tronkstraf, opgeskort vir vyf jaar, gevonnis in die Krugersdorp-landdroshof, het dierewelsyngroepe gesê.
Sy is verder ‘n vonnis van 12 maande huisarres opgelê, het die Community Led Animal Welware (Claw) en die Internasionale Fonds vir Dierewelsyn in ‘n gesamentlike verklaring gesê.
“Voorts sal Van Wyk ook vergoeding moet betaal vir die veeartsenykundige koste wat opgeloop is toe gepoog is om die hond se lewe te red nadat hy gered is. Sy word nie toegelaat om ooit weer ‘n dier te besit nie en mag ook nooit ‘n vuurwapen besit nie.”
Van Wyk is skuldig bevind aan wreedheid teenoor diere nadat sy haar hond in pyn laat ly het nadat een van sy agterste bene afgeruk is, blykbaar toe hy deur ‘n motor getref is.
Claw het die dier – ‘n Jack Russel genaamd Jack – in 2009 gered ná ‘n oproep van Van Wyk se bure, wat gesê het die hond het minstens 24 uur lank in die oprit gelê.
Mediese optrede was egter te laat.
“Geen woorde kan beskryf deur watter hel daardie arme klein hond moes gaan nie, terwyl sy eienaar, die persoon wat hy die meeste sou vertrou, eenvoudig verby hom geloop het terwyl hy hulpeloos en in pyn gelê het,” het Cora Bailey van Claw, een van die mense wat Jack gevind het, gesê.
“Dit is nog ‘n voorbeeld van hoe die eienaar van die hond bloot nie die verantwoordelikheid wat daarmee saamkom om ‘n troeteldier te besit, aanvaar het nie.”
- Volg Nuus24 op Twitter
- SAPA