Vrou geskiet in aanval op plaas
2011-11-23 08:03
Stellenbosch – Die erg gewonde slagoffer van nóg ’n plaasaanval in die Wes-Kaap is Maandagaand in ’n bloeddeurdrenkte plaashuis buite Grabouw gevind.
Dit is die tweede plaasaanval in vier dae in die provinsie.
Shirleen Booysen (59) is Maandagaand op die plaas Blauwkrans gevind waar sy met vasgemaakte hande en ’n swart gordel om haar nek in die huis gelê het.
Ao. November Filander, ’n provinsiale polisiewoordvoerder, het gesê Booysen het twee skietwonde opgedoen – aan haar voorkop en haar regterarm. Sy is in ’n kritieke toestand in die hospitaal.
Die Grabouw-polisie het omstreeks 21:00 ’n oproep oor die voorval ontvang en hulle na die toneel gehaas, het Filander gesê.
Ene mnr. Mohr het die polisie oor die aanval op Booysen ingelig met hul aankoms.
Volgens Mohr het die slagoffer se dogter hom gebel toe sy bekommerd geraak het nadat haar ma nie haar oproepe beantwoord het nie.
“Mohr het die huis binnegegaan deur die kombuisdeur wat wawyd oop gestaan het. Hy het die vasgemaakte slagoffer in die bloeddeurdrenkte huis gevind en die polisie en ambulansdienste ontbied,” het Filander gesê.
Geld word uit Booysen se handsak vermis. Daar is geen teken van gedwonge toegang tot die huis nie, het die polisie gesê. ’n Saak van roof en poging tot moord word ondersoek. Niemand is tot dusver aangekeer nie.
Carl Opperman, uitvoerende hoof van Agri Wes-Kaap, het gesê hulle sukkel sedert Junie om ’n vergadering met lt.genl. Arno Lamoer, Wes-Kaapse polisiekommissaris, te kry om die inwerkingstelling van die nasionale landelike veiligheidsplan te bespreek.
– Volg Nuus24 op Twitter
- Die Burger