Vrou ernstig beseer ná hond haar aanval
2011-10-25 15:33
Johannesburg – ‘n Vrou het ernstige beserings opgedoen nadat ‘n hond haar glo in die Johannesburgse voorstad Kensington aangeval het, het paramedici gesê.
Die vrou het Dinsdagoggend in Clactonweg gestap toe die groot hond haar na bewering aangeval het, het Vanessa Jackson, ‘n woordvoerder vir ER24, in ‘n verklaring gesê.
Jackson sê die hond het op haar gespring en haar linkerskouer gebyt.
Die vrou het op die grond geval en die hond het haar na bewering ‘n kort afstand gesleep voordat die dier haar weer op haar been gebyt het, het Jackson vertel.
Die vrou, wat in haar laat 40’s is, moes onmiddellik behandel word toe paramedici by die toneel opgedaag het.
Jackson sê die vrou was in baie pyn en haar kuit het aansienlike snye en skeure gehad. Daarna is die vrou na ‘n hospitaal geneem vir verdere behandeling.
Volgens die hond se eienaar is dit die eerste keer dat die troeteldier ‘n mens aanval. Die eienaar het bygevoeg dat ‘n groep kinders op ‘n gereelde basis verbyloop en die hond terg.
Jackson sê dis onbekend wat met die hond gaan gebeur. Sy sê die nodige ondersoeke sal gedoen word.
Volg Nuus24 op Twitter
- Nuus24