Vrou en haar minnaar vas vir moord
2011-12-29 08:43
Durban. – ’n Vrou en haar minnaar is aan die
KwaZulu-Natalse suidkus aangekeer enkele ure nadat hulle haar man, ’n
polisiekonstabel, glo in sy slaapkamer vermoor het.
Hulle het hom toe in
sy motor gesit sodat dit sou lyk of hy verongeluk het.
Die lyk
van die 34-jarige konstabel van die Ezinqoleni-polisiekantoor is
eergister in die vroeë oggendure in sy motor langs ’n pad in dié
township naby Margate gevind.
Volgens lt.kol. Vincent Mdunge,
polisiewoordvoerder, het die motor van die pad geloop en teen ’n reling
gebots.
Die polisiebeamptes wat die vermeende ongelukstoneel ondersoek
het, het egter lont geruik omdat die motor se enjin afgeskakel was en
daar geen remmerke was nie.
Die skade aan die motor was ook nie van so ’n aard dat dit die konstabel se ernstige kopbeserings sou verklaar nie.
Die
konstabel en sy vervreemde 26-jarige vrou het ’n stormagtige huwelik
gehad en het elk ’n hofbevel teen die ander bekom weens huishoudelike
geweld, het Mdunge gesê.
Die konstabel het sy vrou van ’n buite-egtelike verhouding verdink.
Hy is Dinsdag laas lewend gesien toe sy vrou en haar minnaar hom glo agtervolg en hom saam met ’n ander vrou gesien het.
Die konstabel se vrou het daaroor met hom rusie gemaak.
Polisiebeamptes het haar ondervra omdat sy een van die laaste mense was saam met wie hy lewend gesien is, het Mdunge gesê.
Dit
het daarna na bewering aan die lig gekom dat die konstabel in sy
slaapkamer met ’n stomp voorwerp toegetakel en in die nek en agterkop
gesteek is.
Die twee verskyn eersdaags in die landdroshof in Margate op aanklag van moord.
Volg Nuus24 op Twitter.
- Beeld