Vrou eis ná gaas in buik vrot
2011-05-12 09:52
Johannesburg – 'n Oos-Kaapse Vrou dagvaar die staat vir R2,5 miljoen nadat 'n groot stuk gaas wat sowat 'n jaar gelede tydens 'n operasie gebruik is, in haar buik gelaat is om te vrot, berig The Times.
Zoliswa Quvane (27), 'n straatsmous, is in die Frere-hospitaal opgeneem nadat sy op 1 April gesteek is. 'n Stuk gaas wat gebruik is om haar bloed op te suig is ná die operasie in haar buik agtergelaat.
Die pyn was so erg dat sy haar werk moes los en haar enigste bron van inkomste vir haarself en haar twee kinders verloor.
'n Dokter by dieselfde hospitaal het 'n jaar later ná verskeie hospitaalbesoeke, die bron van Quvane se pyn gevind.
In dokumente wat verlede maand by die hooggeregshof in Oos-Londen ingedien is, word beweer dat die hoofchirurg, net bekend dr. Santhia, die operasie gedoen en die wond toegewerk het terwyl die gaas nog in Quvane se buik was.
Quvane is in April verlede jaar uit die hospitaal ontslaan, maar het "erge pyn" gehad. Haar buik was so geswel dat mens sou dink sy is swanger.
Sy het private dokters en spesialiste by die Butterworth gaan sien, maar is teruggestuur na Frere waar 'n X-straal op 9 Maart die "vreemde voorwerp" uitgewys het.
Quvane dagvaar die Frere-hospitaal en die provinsiale departement van gesondheid vir R2,5 miljoen. Sy eis R500 000 vir algemene skade, R1 miljoen vir pyn en leiding, R50 000 vir die verlies van inkomste, R250 000 vir mediese onkoste en R236 000 vir die verlies van verlede en toekomstige inkomste.
Volg Nuus24 op Twitter
- SAPA