Vrou brand los – huisrower sterf
2010-08-07 08:01
Beeld
’n Huisrower is dood nadat ’n sielkundige van Menlopark, Pretoria, hom in haar huis betrap en raak geskiet het.
Die gewonde rower het egter voor sy dood eers deur mev. Ronell Mentz (58), ’n kliniese sielkundige, se tuin gestrompel, oor die muur geklim en in die buurman se swembad geval.
Lede van die Brooklyn-polisiekantoor wat binne minute op die toneel was, het die rower uit die swembad gered, maar hy het oomblikke later in die ambulans beswyk.
“Ek dink nie ek is ’n heldin nie,” het Mentz gesê.
“Dis nie ek wat so oulik of so dapper was nie. Daar is Iemand wat na my gekyk het. Ek was net gelukkig.”
Mentz het gisteroggend 01:30 wakker geword van haar hond, Gina, wat grom.
Sy het die lig aangeskakel en kon aan haar hond se gedrag sien dat iets fout is.
Mentz het haar kamerdeur oopgemaak. ’n Paar meter van haar af het sy ’n man met ’n flits gesien.
“Hy het aan my geskree: ‘I will shoot you’,” het Mentz gesê.
“Ek is nie seker wat ek aan hom teruggeskree het nie, maar ek is terug kamer toe waar ek my rewolwer uit my kluis gaan haal het.
“Terug in die huis in het ek twee figure in die gang gesien. Toe begin ek skiet.
“Ná die vierde skoot het ek besef ek moet padgee, want ek het nog net een patroon in die wapen oor.
“Ek het na my dogter se kamer toe gehardloop en aan haar gesê om die polisie te bel.”
Mentz se dogter, Marina (32), het die Brooklyn-polisiekantoor gebel en ’n “mag polisiemanne” was binne minute by hul huis.
Die polisie het die huis deursoek.
Buite het klere, wat die rowers gebuit het, in ’n streep gelê wat na die buurman se muur gelei het.
Ná verdere ondersoek het die polisie een rower in die buurman se swembad gekry. Hulle het hom gered, maar hy is kort daarna in die ambulans dood.
Brig. André Wiese, stasiebevelvoerder van die Brooklyn-polisiekantoor, het gesê ’n tweede rower is nog op vrye voete.
Volgens Wiese het die polisie ook een van die rowers se vuurwapens in Mentz se tuin gekry.
“Ons het absolute lof vir die polisie. Hulle was vinnig hier en het professioneel, ondersteunend, met empatie en met begrip opgetree,” het Mentz gesê.
’n Huisroof word ondersoek.