Vrou bewe toe sy 'duiwel' Kotzé in oë kyk
2012-01-13 07:46
Modimolle – “Dit het gevoel of ek die duiwel sien.”
Só vertel Surinda du Preez nadat sy Dinsdagaand vir Johan Kotzé (50) by ’n kafee in Modimolle (Nylstroom) gesien het.
“Ek het so gebewe toe ek hom sien. Ek kon in sy oë sien dat hy weet ek het hom herken,” het Du Preez gesê.
Sy het omstreeks 20:00 in die boomryke Boshoffstraat met haar twee jong seuns gery om hulle “aan die slaap te sus”.
“Ons was almal maar op die uitkyk vir ’n wit (Toyota) Fortuner. Ek kon dit skaars glo toe ek die voertuig naby die kafee sien.”
Die wit Toyota Fortuner (DCS 392 FS) was ver van die kafee in swak lig geparkeer. Du Preez het voor die Duggans Supermark se deur stilgehou. “Ek het by die deur ingekyk en toe kyk hy vir my. Hy was besig om te betaal.”
Kotzé het twee 5 liter bottels water, blikkies boeliebief en Energade gekoop. “Ek het dadelik begin agteruit ry en reguit huis toe gejaag.” Du Preez bly sowat ’n blok vanaf die kafee.
Sy het vir ’n polisielid wat daar naby bly dadelik gesê sy het Kotzé gesien.
“Hulle wou my eers nie glo nie en het aanhou vra of ek seker is. Ek het vir hulle gesê ek lees elke dag koerant en weet hoe lyk die man.”
Du Preez se man, Anton, en sy broer, Werner, het in hul Toyota Land Cruiser in die rigting van die Drie Hekke-hoewes, waar Kotzé geskuil het, gejaag. “Daar is baie viertrek-roetes daar en my man het vermoed hy is dalk in daai rigting.
“Hulle het in die veld groot geword en ken die gebied. Hulle het die merke van die Fortuner se wiele op die grondpad gesien,” het mev. Du Preez gesê.
Die twee mans het ’n plek in die ruigte gesien waar voertuigspore in is. “Toe sien hulle hoe die binne-liggie van die Fortuner aangaan.” Hulle het die polisie gebel. Die polisie was binne enkele minute daar. Kotzé het met die Fortuner teen ’n doringboom vasgejaag. Die windskerm van die motor is gekraak.
“My man en swaer wou in die veld in ry op soek na hom, maar die polisie het gesê hulle moenie, want hy is gevaarlik en kan goed skiet.”
Kotzé het toe te voet gevlug. Dit is steeds ’n raaisel waar hy Dinsdagnag deurgebring het. “Dit is so arrogant van hom om met sy motor met die FS-registrasienommer, waarna almal soek, in te ry dorp toe,” het Du Preez gesê.
Volgens du Preez het ’n werker by die kafee gesê Kotzé het Sondagaand ook water en boeliebief daar gekoop.
In die Fortuner was twee grys komberse op die agtersitplek. Daar was ook ’n R10-noot en ’n paar los muntstukke voor in die motor. ’n Paar veldskoene, leë koeldrankhouers en ’n gasbottel was agter in die voertuig. ’n Skryfblok het op die passiersitplek gelê. Kotzé het hierin glo dagboek gehou.
Volg Nuus24 op Twitter
- Volksblad