Vrou (72) skiet rower dood
2011-06-12 17:30
Oos-Kaap – 'n Vrou (72) wat op haar eie woon, het 'n inbreker in St. Francisbaai geskiet nadat sy vasgebind en gedreig was, het die polisie in die Oos-Kaap Sondag gesê.
Twee mans het Sondagoggend omstreeks 03:00 deur 'n venster geklim en haar met 'n mes en skroewedraaier gedreig, het ao. Marianette Olivier gesê.
Die vrou is geblinddoek, vasgebind en gedwing om die pinnommers van haar bankkaarte aan die mans te gee.
"Terwyl een van die mans met haar motor gery het om geld uit haar rekening te onttrek, het sy haarself losgemaak en 'n vuurwapen uit die kas gehaal. Die man het probeer om haar vuurwapen te gryp, waarna sy skote afgevuur en hom doodgeskiet het. Die tweede man het teruggekom en haar met die vuurwapen gesien en weggehardloop," het Olivier gesê.
'n Saak van moord en huisroof word ondersoek.
"Niemand is van moord aangekla nie. Ons sal formele ondersoeke doen en 'n dossier na die openbare vervolger stuur voor 'n besluit geneem word," het Olivier gesê.
Volg Nuus24 op Twitter
- SAPA