Vrou 6 dae lank in huis vasgebind
2010-02-18 09:56
Johannesburg - ’n 77-jarige vrou van Vanderbijlpark het wonderbaarlik oorleef nadat ’n rower haar aangerand en sy ses dae lank alleen vasgebind in haar huis gelê het.
Susan Grobler was erg ontwater toe Herman Leeuwner, ’n buurman, haar Woensdag omstreeks 05:00 vasgebind in haar slaapkamer ontdek het.
Hy was op pad werk toe en op die punt om in sy bakkie langs Grobler se huis te klim toe hy haar van binne desperaat by haarself hoor prewel het.
“Sy het met ’n sagte stem gesê: ‘As ek net my hande kan loskry, as ek net my hande kan loskry,’” het hy vertel.
Hy het twee ander buurvroue om hulp genader. Hulle het gaan kyk wat aangaan toe niemand antwoord op Grobler se selfoon kon kry nie.
Grobler is gewoonlik erg veiligheidsbewus, maar die voorhek het oopgestaan, sowel as die veiligheidshekke by haar voor- en agterdeur.
Binne die huis het Leeuwner haar op haar slaapkamermat gekry met haar hande agter haar rug vasgebind en haar voete met veters aan mekaar vas. “Haar voete was ook met ’n stuk tou aan haar spieëlkas vasgebind,” het hy vertel.
Nadat hy die toue losgesny het, het hy inderhaas die polisie en nooddienste se hulp ingeroep. Sy is per ambulans na die Sebokeng-hospitaal geneem.
’n Erg verswakte Grobler, haar gesig oortrek van pers kneuswonde, het vanuit haar hospitaalbed vertel sy het verlede Donderdagoggend hoender in die oond gaargemaak omdat haar dogter, Carla Oosthuizen, sou kom kuier.
Oosthuizen, wat sowat ses blokke van haar ma woon, het laat weet haar kleinkind is vir die dag by haar en sy sal nie kan kom nie.
Sy het beloof om vandag te kom kuier.
Kort daarna het Grobler haar vullissakke op die plaveisel buite haar huis gaan neersit toe ’n man met ’n skêr haar skielik aan haar arm gryp.
“Hy het my toe binnetoe gedwing en my ’n taai klap in die gesig gegee.”
Die man het aangedring op haar bankkaarte en gedreig om haar dood te maak.
Sy het kort daarna haar bewussyn verloor en kan slegs onthou hoe hy haar later weer deur die gesig geslaan het.
In ’n stadium het hy haar broekie uitgetrek en bo-op haar gaan sit, maar haar genadiglik nie verkrag nie, het sy gesê.
Later het hy haar hande en voete vasgebind en haar aan die spieëlkas vasgemaak.
“Ek het hom heeltyd gesmeek om asseblief net my hande en voete los te maak, maar hy het hom nie aan my gesteur nie.”
Ses dae lank het sy so gelê – stoksielalleen, en sonder kos, water óf haar chroniese hartmedikasie.
By Beeld se besoek Woensdag was die reuse-seerplekke aan haar bene waar haar eie urine haar naderhand gebrand het, duidelik sigbaar. Dit is ’n wonderwerk dat sy oorleef het, het Oosthuizen emosioneel gesê.
“Kan jy dínk? Ses dae lank so sonder kos en water? Ek glo dit is net God wat haar liggaam sterk gehou het.”
Insp. Kinnie Steyn, polisiewoordvoerder, het gesê Grobler se juwele en bankkaarte word vermis.
Die polisie ondersoek ’n saak van huisroof.
- Beeld