Vreugde toe baba en ouers herenig
2009-08-28 07:55
Maygene de Wee en Marlene Neethling
Kaapstad - “Siphesihle (mooi geskenk) is wat ek nou ons babaseun gaan noem,” het Vuyisa Mgqada, pa van die ontvoerde baba, ook bekend as baba BZ Ncumani, gister gesê toe hy sy seun in sy arms gehou het.
Baba BZ is gistermiddag met sy ma, Zimkhitha Ncumani, en pa herenig nadat die polisie hom Dinsdagaand by die huis van ’n 31-jarige vrou, Bulelwa Xesa, opgespoor het.
Talle bure, vriende en familielede het buite die Ncumani-huis saamgedrom in afwagting op die ontvoerde baba se aankoms.
DNS-toetse is Woensdag op die kleintjie gedoen en die uitslae is gistermiddag bekend gemaak.
Nadat die DNS-toetse gewys het die baba is wel Ncumani se kind, het die polisie die ma by die huis gaan haal om haar kind aan haar te gee.
Die baba is op 24 Julie uit die kraamafdeling van die Tygerberg-hospitaal ontvoer nadat Ncumani weens komplikasies tydens die geboorte in ’n koma gegaan het. Hy was toe twee weke oud.
Sy het twee weke gelede haar bewussyn herwin en is oor die ontvoering ingelig. Gister het sy aan die media gesê sy is verheug dat haar kind terug is. “Nou wil ek hom net veilig hou en kerk toe gaan om die Vader te dank.”
Mgqada het gesê hy was aanvanklik kwaad vir die hospitaal en sy personeellede nadat hul baba ontvoer is. “Dit was ’n plek waar ons kind veilig gehou moes word,” het hy gesê.
Dan Plato, burgemeester van Kaapstad, het gesê die hele stad is saam met die familie en die Delft-gemeenskap bly dat die kindjie teruggevind is.
Siphesihle se vermeende ontvoerder het gister in die Bellville-landdroshof op ’n aanklag van kinderontvoering verskyn.
Die baba is deur die polisie opgespoor nadat ’n lid van die publiek hulle ingelig het van ’n baba by ’n vrou wat nooit swanger was nie.
- Die Burger