Vragmotorongeluk eis drie
2010-03-09 06:50
.Johannesburg – Die verkeer op die N3-snelweg in Pietermaritzburg het Dinsdagoggend botstil gestaan nadat ’n vragmotorongeluk drie konstruksiewerkers se lewens geëis het en talle ander beseer is, het paramedici gesê.
Dié ongeluk het hewige verkeer in die rigting van Pietermaritzburg naby Townhill meegebring waar die ongeluk plaasgevind het, het Jeff Wicks, Netcare 911 se woordvoerder gesê.
"Die geslote baan op die N3 is weer heropen. Wrakstukke van die vragmotor word steeds uit die weg geruim.”
Die ongeluk het plaasgevind toe die bestuurder van die vragmotor, wat plastiekpype vervoer het, beheer oor die voertuig verloor het en ‘n werker getref het. Die man is op die toneel oorlede.
“Die ongeluk het omstreeks middernag plaasgevind. Een baan is noodgedwonge gesluit. Twee ander vragmotors het kort na dié ongeluk in die res van die groep werkers in die geslote baan vasgery.
“Die visvragmotor het van die pad afgegaan en teen die ander vragmotor, wat staal vervoer het, gebots. Die staalvragmotor het toe teen die vragmotor gebots wat plastiekpype vervoer het.”
Die lyke van die ander twee werkers is aan die kant van die pad aangetref.
Twee ander werkers is in ‘n kritieke toestand en nog drie werkers is matig tot ernstig beseer, het Wicks gesê.
-Sapa