Vragmotor sleep, val op motor - 2 sterf
2011-02-25 10:34
Johannesburg - Twee mans is dood toe 'n vragmotor in Sebokeng teen 'n motor gebots het, het Gautengse paramedici Vrydag gesê.
"Die impak was baie erg en die vragmotor het die vier-deur-luikrug ongeveer 25 meter ver gesleep voor dit op die voertuig omgeslaan het," het Andre Visser, ER24 se woordvoerder, gesê.
Die mans, in hulle dertigs, was Donderdagaand na 'n T-aansluiting op die Randfontein-pad op pad toe die vragmotor teen die kant van hulle motor gebots het.
Albei mans is op die toneel dood.
Die vragmotorbestuurder is nie beseer nie.
- Volg Nuus24 op Twitter.
- SAPA