Vragmotor ploeg deur huis; vrou ongedeerd

2013-01-18 13:55

ER24, via Twitter

Nielen de Klerk

Pietermaritzburg – ‘n Vrou was gelukkig om besering vry te spring toe ‘n vragmotor vroeg Vrydagoggend deur ‘n huis in Pietermaritzburg geploeg het, het nooddienste gesê.

“Die vragmotor het aan die kant van die pad gestaan terwyl die bestuurder na ‘n nabygeleë winkelsentrum gegaan het om geld te trek,” het Joey Jeevan, ‘n polisiewoordvoerder, aan Nuus24 gesê.

Die vragmotor se remme het losgekom en die voertuig het by die afdraande af beweeg en deur die huis geploeg.

“Die vragmotor het amper deur die hele huis gegaan,” het Derrick Banks, woordvoerder van ER24, aan Nuus24 gesê.

Die kombuis en eetkamer is vernietig en die vragmotor het in die kamer tot stilstand gekom.

Die eienaars van die huis is glo in Kaapstad en ‘n 20-jarige meisie pas die huis op terwyl die eienaars weg is.

Sy het gesien hoe die vragmotor nader kom en het na ‘n ander vertrek gehardloop.

Sy is deur ‘n omstander na ‘n hospitaal geneem voordat nooddienswerkers op die toneel aangekom het.

‘n Saak van roekelose en nalatige bestuur sal geopen word.

– Volg Nuus24 op Twitter