Vrae oor medisyne wat in O-Kaap gestort is

2012-07-21 08:30

Kaapstad – Die polisie het tussen die Mvezo- en Mbashe-riviere in die Oos-Kaap op tientalle kartonne medisyne afgekom, het RSG Saterdag berig.

'n Woordvoerder van die polisie, Mzukisi Fatyela, sê hulle het 'n wenk ontvang dat die medisyne in die bosse naby die rivier gestort is.

Fatyela sê hulle het die kartonne met die medisyne na die Bityi-polisiestasie geneem.

Hy sê amptenare van die departement van gesondheid is ingeroep om te help om die waarde van die vonds te bepaal.

Fatyela sê hulle weet dat die medisyne aan van die staatshospitale in die omgewing behoort, maar moet nog die spesifieke hospitale identifiseer. Niemand is nog in hegtenis geneem nie en die ondersoek duur voort.

'n Woordvoerder van die Oos-Kaapse departement van gesondheid, Sizwe Kupelo het intussen gesê 'n span aptekers is na die Bityi-polisiestasie gestuur om ondersoek in te stel.

Hy sê hulle kan bevestig dat die medisyne van die Mthatha-depot afkomstig is.

Kupelo sê hulle moet nou bepaal hoekom die medisyne uit die depot verwyder en op die bepaalde plek gestort is.

Volg Nuus24 op Twitter.

– RSG