Vrae oor babalyk by Oprah-skool

2011-02-18 08:09

Jacques Steenkamp, Leané du Plessis en Riata Nel

Johannesburg - ’n Sluier van geheimhouding is getrek oor die omstandighede waarin ’n babalykie Woensdag by die Oprah Winfrey Leadership Academy for Girls in Henley-on-Klip gevind is.

Terwyl gerugte Donderdag die ronde gedoen het dat die Amerikaanse kletsprogramaanbieder op pad Suid-Afrika toe is, wou nóg die skool nóg die polisie enige inligting verskaf.

Paramedici is omstreeks 20:00 Woensdagaand na die skool ontbied nadat ’n 17-jarige meisie vier ure vroeër geboorte aan ’n babaseuntjie gegee het. Sy het glo baie gebloei en is in die Midvaal-hospitaal in Vereeniging opgeneem.

Hulle het later die lykie in ’n plastieksak tussen bebloede klere ontdek nadat van die meisie se vriendinne die sak aan die paramedici oorhandig het.

Kapt. Shado Mashobane, polisiewoordvoerder, het die voorval bevestig. Hy het gesê ’n klag van die verberging van ’n sterfte word voorlopig teen die meisie ondersoek.

Dié klag sou verander word indien die lykskouing, wat Donderdagmiddag op die baba uitgevoer is, sou toon hy is vermoor.

’n Woordvoerder van die hospitaal het Donderdag gesê die meisie, ’n gr.11-leerling aan die skool, is Donderdagoggend ontslaan. Sy wou nie meer inligting gee nie.

Volksblad het vertroulik verneem die meisie het Donderdag met ’n berader gepraat en dat haar ouers van die Oos-Kaap op pad na haar toe is.

Ondanks verskeie oproepe, wou die skool se woordvoerders geen kommentaar lewer nie, terwyl polisielede Donderdag teen 18:00 geen inligting rondom die lykskouing gehad het nie.

Gerugte dat Winfrey in die land is om glo met die meisie en haar ouers te praat, kon ook nie gestaaf word nie.

Winfrey het verlede maand in ’n onderhoud met Pierce Morgan vertel hoe moeilik dit vir haar was om 14 en swanger te wees. Sy het teenoor hom gebieg dat sy haar lewe wou beëindig.

Winfrey het die baba twee weke ná sy geboorte verloor. Sy het aan Morgan gesê “as jy 14 is en jy het ’n baba, is jou lewe verby”.

“Ek was baie verlig om die baba, met wie ek geen band gehad het nie, te verloor. Dit was my tweede kans in die lewe,” het Winfrey gesê.

- Volksblad