Vrae oor Mandela se gesondheid
2012-12-09 10:48
Johannesburg – Van oudpres. Nelson Mandela se naasbestaandes, en selfs sy eie stigting, was in die duister ná hy Saterdag in 'n hospitaal in Pretoria opgeneem is, het berigte Sondag gelui.
Sello Hatang, woordvoerder vir die Nelson Mandela-stigting, het aan City Press gesê hy is nie bewus van Mandela se hospitalisasie nie.
"Het hulle 'n mediaverklaring uitgereik?" het hy gevra.
Mandela se eksvrou, Winnie Madikizela-Mandela, was ook nie bewus van sy hospitalisasie nie, het Bantu Holomisa, president van die UDM, aan die koerant gesê. Hulle het 'n sokkerwedstryd saam bygewoon.
Adjunkpres. Kgalema Motlanthe sou Mandela die week in Qunu, in die Oos-Kaap besoek, maar die besoek is gekanselleer.
"City Press verneem ook dat die vliegtuig wat veronderstel was om Motlanthe na Qunu te neem, eerder gestuur is om mediese personeel te neem om na Mandela om te sien," het die koerant berig.
– Volg Nuus24 op Twitter.
- SAPA
