Vrae oor Malema se naam op ledelys
2010-05-09 06:31
Piet Rampedi, Rapport
Johannesburg - Tot verlede week nog het Julius Malema, leier van die ANC-jeugliga, se lidmaatskap nie op die regerende party se databasis verskyn nie.
Maar toe sy dissiplinêre verhoor Maandag begin, was sy naam wel op die ledelys.
Indien hy nie ’n betaalde lid van die ANC was nie, sou Malema nie voor ’n dissiplinêre verhoor gedaag kon word nie, en sou hy ook nie ’n leier van die jeugliga kon wees nie.
Die enigste Malema in die 2008- en 2009-rekords van sy Barney Molokoane-tak in Seshego, Polo-kwane, was sy ouma Sarah (81).
“Ons rekords toon Julius het die afgelope twee jaar nie sy lidmaatskap met die taksekretaris hernieu nie,” het die takvoorsitter, mnr. Matlala Maremane, gesê.
Maar Malema het teruggekap: “Die nasionale lidmaatskapstelsel is ’n probleem. Vra vir Fikile Mbalula, hoof van veldtogte, hy sal jou sê. Hulle probeer om die stelsel nog perfek te kry. By tye, wanneer jy ’n naam soek, kan jy dit nie kry nie.
“Ek is ’n lid. Kontak Boy Mamabolo en David Morapedi, jeugliga- en ANC-taksekretarisse.”
Morapedi het gister gesê: “Daar is twee tipes lidmaatskap: drukstukke (hard copy) of elektronies. En ons boekstaaf lidmaatskap net in drukstuk-lêers. Malema het ’n vyfjaar-lidmaatskapkaart wat, as ek reg onthou, in 2013 verstryk.”
Die herrie oor Malema se lidmaatskap volg nadat bronne in die ANC beweer het ’n skikking sal moontlik bereik word met sy hangende dissiplinêre verhoor weens vrese oor hoe die saak die party se nasionale algemene raad (’n groot byeenkoms vir ANC-lede) in September kan belemmer.
Die weekblad Mail & Guardian het Vrydag berig dat Malema gaan bevraagteken of die dissiplinêre komitee die reg het om hom te verhoor.
Sommiges in die ANC bepleit nou ’n pleitooreenkoms vir Malema.
- Rapport