Vrae oor Dakota-ongeluk onbeantwoord

2012-12-12 08:14

Johannesburg – Die vakbond vir veiligheidsmagte, Sasfu, sê daar is nog baie vrae oor die noodlottige ongeluk waarin ‘n militêre vliegtuig verlede naweek in die Drakensberge neergestort het.

Ses bemanningslede en vyf passasiers het in die vliegramp gesterf.

Die SABC berig die vakbond het gevra vir ‘n onafhanklike kommissie van ondersoek na die ongeluk, maar die weermag het dié versoek van die hand gewys.

Siphiwe Dlamini, ‘n woordvoerder vir die weermag, sê hul eie ondersoekspan is meer as bevoeg om die ondersoek uit te voer.

Nosiviwe Maphisa-Nqakula, minister van verdediging, het gesê gure weer kon tot die ongeluk bygedra het.

Die vliegtuig het by die Waterkloof-lugmagbasis in Pretoria opgestyg en was onderweg na Mthatha in die Oos-Kaap.

Genl. Marthie Visser, woordvoerder van die lugmag, het gesê die vliegtuig is onlangs opgradeer.

Lees meer hier

Volg Nuus24 op Twitter