Voortvlugtige 'moordenaar' by skool vasgetrek
2012-08-14 10:30
Johannesburg – ‘n Vermeende moordenaar wat sewe jaar gelede uit ‘n psigiatriese hospitaal ontsnap het, is in hegtenis geneem nadat hy as ‘n opsigter by ‘n laerskool gewerk het, is Dinsdag berig.
Madhan Maharaj (49) is in 2005 in hegtenis geneem en na die Mountain Rise-polisiekantoor geneem nadat hy sy vrou, Caroline, met 'n staalpyp aangeval en keelaf gesny het, berig The Witness.
Hy het versoek om eerder na New-tronk gestuur te word en het beweer hy het aambeie en dat dié tronk beter mediese sorg sal bied.
Hy is egter na die Fort Napier-hospitaal gestuur vir psigiatriese waarneming en het 'n week later ontsnap.
Speurkapt. Pipes Haffajee het aan die koerant gesê die polisie het nie ophou glo dat hulle Maharaj tydens die sewe jaar wat hy voortvlugtig was, sal vastrek nie.
Die plaaslike polisie en die misdaadintelligensie-eenheid in KwaZulu-Natal het hom by ‘n laerskool in Phoenix, Durban, waar hy as ‘n opsigter gewoon en gewerk het, opgespoor.
Haffajee sê Maharaj het verras gelyk toe die polisie hom gevind het en dat sy voorkoms verander het.
“Hy is nou baie ouer. Hy het ‘n paar tande verloor en is bles,” het hy gesê.
Maharaj sal Dinsdag op aanklagte wat verband hou met die moord en sy ontsnapping in die Pietermaritzburg-landdroshof verskyn.
– Volg Nuus24 op Twitter
- SAPA
