Voormalige Orlando Pirates-baas in hof

2011-11-16 09:07

Rakhange Humphrey Setshedi

Jana Breytenbach

Kaapstad – Die voormalige bestuurder van die sokkerspan Orlando Pirates het Dinsdag vlugtig in verband met beweerde wedstrydknoeiery in die Kaapstadse landdroshof verskyn.

Rakhange Humphrey Set­shedi (41) van Sandton is in op 8 Junie by die V&A Waterfront deur die Valke in ’n lokval gevang.

Hy word van korrupsie aangekla.

Landdros Justhree Steyn het die saak na die Bellville-handelshof oorgeplaas en Setshedi sal op 13 Desember in dié hof verskyn. Setshedi is op borgtog van R10 000 vrygelaat.

Mpumalanga Sevutsa Stars en Garankuwa United sou in Junie in Kaapstad teen mekaar speel.

Volgens die polisie wou Setshedi glo beamptes van die Suid-Afrikaanse Sokkervereniging (Safa) omkoop om die wedstryd in Mpumalanga Sevutsa Stars se guns te beklink. Die span was in daardie stadium in ’n promosie-relegasiestryd vir bevordering na die Nasionale Eersteliga gewikkel.

Setshedi het die beamptes na bewering in ’n hotel in Kaapstad genader en probeer omkoop. Hulle het die Valke gekontak en ’n opvolg-vergadering is by die V&A Waterfront gereël.

By dié ontmoeting het Setshedi na bewering R2 000 aan speurders, wat hulle as sokkerbeamptes voorgedoen het, oorhandig.

Hy is ná die transaksie in hegtenis geneem.

Volg Nuus24 op Twitter

- Volksblad