Voormalige Bafana-speler doodgesteek
2012-01-21 13:23
Johannesburg – Jeffrey Ntuka, 'n voormalige sokkerspeler van die Bafana-span, is vroeg Saterdagoggend in Kroonstad by 'n plaaslike nagklub doodgesteek, het Kickoff.com op hul webwerf berig.
Besonderhede rondom die voorval wat tot die 26-jarige Ntuka se dood gelei het is nog vaag, maar daar word beweer dat hy en een van sy vriende in 'n rusie betrokke was oor 'n boksie vuurhoutjies, het SuperSport.com berig.
Volgens Maselela Langa, 'n polisiewoordvoerder by die Maokeng polisiestasie in die Vrystaat, is die persoon wat Ntuka doodgesteek het aan hulle bekend maar hy mag nie sy naam bekendmaak nie.
Die verdagte is steeds op vrye voet, maar die polisie is besig om na hom te soek en hoop om hom voor die einde van die dag te arresteer, het Langa gesê.
Michael Hughes van Stella Africa het Ntuka se heengaan bevestig.
"Ek het met sy vrou gepraat en sy het bevestig dat Ntuka oorlede is."
Ntuka en sy vrou is glo van mekaar vervreem.
Hy het in 2003 na Chelsea in Engeland geskuif en is kort daarna vir die klub Westerlo geleen. Hy was 'n gereelde speler vir die nasionale o.23-span en het vyf keer vir Bafana Bafana gespeel.
Ntuka het ook vir Kaizer Chiefs en SuperSport United gespeel.
– Volg Nuus24 op Twitter.
- SAPA