Vonke spat oor jeug se fortuin
2011-02-25 08:22
Kaapstad - “Ek weet nie.”
Só het Pravin Gordhan, minister van finansies, Donderdag op ’n vraag in die parlement gereageer oor hoe die nasionale jeugontwikkelingsagentskap (NYDA) sy toedeling van meer as R1,2 miljard oor die volgende drie jaar gaan gebruik om werk te skep.
Kobus Marais (DA) het op ’n gesamentlike vergadering van verskeie parlementêre portefeuljekomitees oor Gordhan se begrotingsrede eergister oor die NYDA se planne vir werkskepping gevra.
“Hoe op dees aarde gaan dié organisasie werkskepping stimuleer? Daar bestaan nêrens enige bewyse dat hulle dit kan doen nie,” het hy aan Gordhan gesê.
Begroting
Die NYDA, wat deel van die presidensie uitmaak en onder leiding staan van Andile Lungisa, Julius Malema se adjunk in die ANC-jeugliga, se begroting is vyf keer soveel as Trevor Manuel, beplanningsminister, s’n.
Terwyl Manuel se begroting – wat aangewend moet word om ’n omvattende nasionale visie en bedryfsplan op te stel – oor die volgende drie jaar R242 miljoen gaan wees, kry Lungisa en die NYDA R1,22 miljard “om jeugontwikkeling-ingrypings” te finansier.
Die NYDA het berugtheid verwerf toe hy verlede jaar ’n “anti-imperialistiese” jeugfees aangebied wat op ’n chaos uitgeloop het. Dié fees, wat nagenoeg R100 miljoen gekos het, was volgens Lungisa een van die dryfvere agter die onlangse opstande in Noord-Afrika.
Dit het sedertdien aan die lig gekom die NYDA se bestuur bestaan grootliks uit amptenare van die ANC-jeugliga. Steven Ngobeni, die jeugliga se adjunk-sekretaris-generaal, is ook die hoofbeampte.
Volgens die presidensie se begroting sal die NYDA vanjaar altesaam R188 miljoen aan salarisse bestee – amper die helfte van sy begroting van R386 miljoen.
Stygings
Die gemiddelde vergoedingspakket van NYDA-werknemers het oor die afgelope vier jaar met meer as 600% gestyg: in 2007-’08 was dit R81 000 per werknemer, vanjaar is dit R517 000.
Gordhan het aan Marais gesê die begrotingsproses is uitgerek en ingewikkeld en dat baie rolspelers insette lewer. Hy weet egter nie hoe die NYDA gaan werk skep nie. “Hulle het voorleggings aan die (interministeriële) begrotingskomitee gedoen, waarvan sommige aanvaar is.”
Die NYDA sal na verwagting vanjaar 16 378 werksgeleenthede skep óf bestaande werksgeleenthede “deur middel van entrepreneursprogramme in stand hou”, lui hul strategiese plan volgens die 2011-’12-begrotingsdokument.
Daarvolgens sal die agentskap oor die volgende twee jaar onderskeidelik 18 013 en 19 814 werksgeleenthede skep, vergeleke met die afgelope vier jaar se 14 888, 43 303, 38 304 en 41 002 werksgeleenthede.
Athol Trollip (DA), leier van die opposisie in die Nasionale Vergadering, het gesê sy party is diep bekommerd oor die “heeltemal onbesonne” poging om miljarde rande aan ’n wanbestuurde en ondoeltreffende entiteit te gee.
Die NYDA is deur die ANC-jeugliga “gekaap” en het verlede jaar die meeste van sy strategiese teikens gemis.
Dit is ook kommerwekkend dat behoorlike parlementêre oorsig oor die presidensie nie bestaan nie omdat dit die NYDA verantwoordbaar kon hou.
“Die stewiger begrotingstoedeling is ’n aanduiding dat dit vir dié regering belangriker is om die ANC-jeugliga gelukkig te hou as om werksgeleenthede vir jeugdiges te skep,” het Trollip gesê.
- Die Burger