Voetganger voor kinders met panga gesteek
2009-11-18 10:24
Johannesburg - 'n Bakkiebestuurder in Port Elizabeth het 'n voetganger glo vyf keer met 'n panga gesteek, ten aanskoue van 10 voorskoolse kinders wat hy besig was om te vervoer.
Buyile Vani was Dinsdag besig om op 'n sypaadjie in Port Elizabeth te stap toe 'n bakkie amper in hom vasry, het The Herald Online Woensdag berig.
Toe Vani die bestuurder konfronteer omdat hy jaag, het die man, aan die kinders bekend as Daddy, hom gevloek, die voertuig gestop en Vani gekonfronteer.
Die twee het in 'n argument betrokke geraak en Daddy het Vani met die vuis geslaan. Toe die voetganger terugveg, het die bestuurder 'n panga uit sy bakkie gaan haal.
"Hy het my vyf keer gesteek - in die bors, skouer, boud en maag," het Vani gesê.
Die 10 kinders in die bakkie het die hele voorval aanskou.
Vani is in 'n ernstige toestand in die hospitaal.
Sy aanvaller is op die toneel in hegtenis geneem op 'n aanklag van poging tot moord.
Dit is nie bekend waarheen die bestuurder met die kinders oppad was nie.
- Sapa