Vloedwaarskuwing vir Pretoria
2010-12-16 13:20
Johannesburg – Inwoners van Pretoria en die Tshwane metropolitaanse omgewing is Donderdag gewaarsku om laagliggende areas te vermy as gevolg van verwagte vloede, het die munisipaliteit gesê.
Dele van Centurion en informele nedersettings was veral omgewings wat kommer gewek het, het die woordvoerder vir veiligheid en sekuriteit, William Baloyi, gesê.
Enige vloedgebiede of skade kan by die munisipale rampbestuurspan aangemeld word op 012 358 6400.
Die polisie sal ook paaie sluit waar nodig.
Baloyi het gewaarsku oor kitsvloede in laagliggende areas van Paul Krugerstraat in die middestad, en Rabie- en End-strate is gesluit, sowel as Aster- en Akker-straat in East Lynne.
Daar is ook ‘n moontlikheid dat inwoners daar ontruim kan word.
Motoriste is gewaarsku om versigtig te wees op Voortrekkerweg en Michael Brink-straat, sowel as op Zambezi-rylaan.
Baloyi het gewaarsku dat hierdie paaie in die volgende paar uur gesluit kan word indien die reën voortduur.
Vloede het ook die R101 naby Bon Accord in die rigting van Hammanskraal geraak, maar die pad was nog nie gesluit nie.
Volgens ‘n verslaggewer van Sapa het is motors vasgevang in water nadat hulle probeer het om die R101, noord van Bon Accord, oor te steek.
Baloyi het bygevoeg dat hulle die Soshanguve en Soutpan informele nedersettings en ander laagliggende areas dophou, aangesien inwoners moontlik ontruim kan word.
Alhoewel daar geen onmiddellike voorvalle van vloede aangemeld was nie, word die Hennopsrivier in Centurion en die Apiesrivier in Pretoria-noord, sowel as sekere dele van Hammanskraal, gemonitor.
In Johannesburg was dele van Soweto, Lenasia, Roodepoort en Florida deur die swaar reën geraak.
Metropolisie het motoriste gewaarsku om die N1 te vermy.
Volg Nuus24 op Twitter
- SAPA