Vloedwaarskuwing kom
2011-01-05 14:41
Johannesburg - Die departement van waterwese sal na verwagting Woensdag ‘n vloedwaarskuwing uitreik ná twee dae van swaar reënval wat verwoesting in dele van die land gesaai het.
“Damme is oor hul waterkapasiteite en ons sal binnekort ‘n vloedwaarskuwing uitreik,” het Linda Page, woordvoerder van die departement, gesê.
Die swaar reënval het verskeie gebiede soos Moretele, Hammanskraal, Ladysmith, Newcastle, Roosboom, Driefontein, Mamelodi, Nkandla en Nquthu geraak.
Volgens die owerhede sal noodverligtingsdienste na verwagting na Moretele en Hammanskraal en ontplooi word.
In Ladysmith, KwaZulu-Natal, was ongeveer 50 huise Dinsdag oorstroom.
Die sentrale sakegebied is ook geraak en besighede moes hul deure sluit.
- Volg Nuus24 op Twitter
- SAPA