Vloedgeteisterde Kruger maak weer oop
2012-01-20 14:35
Johannesburg – Die vloedgeteisterde Kruger Nasionale Park het sy hekke weer geopen ná erge oorstromings groot skade aan paaie aangerig het en tientalle toeriste van die buite-wêreld afgesny is, het amptenare Vrydag gesê.
“Alles is nou weer terug na normaal, al die hekke is weer oop. Ons ontvang weer besoekers,” het William Mabasa, woordvoerder van die park, gesê.
Swaar reën het die noordelike deel van die land die afgelope week geteister en gevolglik moes amptenare van die park 60 besoekers wat op safari-ritte gestrand was ontruim.
“Die skoonmaakproses is nog aan die gang, sommige paaie is gister (Donderdag) tydelik herstel,” het Mabasa gesê.
Die Krugerpark lok jaarliks 1,3 miljoen besoekers van oor die wêreld heen.
Mabasa het bygevoeg dat geen diere deur die vloede geraak is nie.
Geen sterftes of ernstige beserings is aangemeld nie.
Ses buitelandse toeriste, waaronder vier Italianers en twee Britte was, is in hul motor weggespoel en moes na dokters in die park geneem word vir behandeling, het hy gesê.
In Mosambiek is vyf mense dood en sowat 4 000 huise is oorstroom toe die storm daar oor beweeg het.
– Volg Nuus24 op Twitter
- AFP