Vloed tref spogbuurt

2009-11-02 06:42

André Damons

Johannesburg - 'n Pa van Sandton het sy tweejarige dogter gegryp en na die boonste verdieping van sy huis gevlug toe ’n vloedgolf deur sy huis gespoel het.

’n Swaar betonblok het Vrydagaand deur ’n glasmuur van die Patricios-gesin se huis in ’n luukse kompleks in Coleraine-rylaan, River Club, geval en kort daarna het die water die huis binnegestroom.

Spero Patricios en sy dogter Arianne het op die rusbank gesit toe die water die voorkamer oorspoel.

“Dit was soos ’n mini-tsoenami en binne minute was die water tot bo my knieë. Ek het Arianne gegryp, die agterdeur oopgemaak en na bo gehardloop,” het Patricios gister gesê.

“Ek het gedink die water gaan net aanhou kom en het nie geweet waar ons katte is nie.”

Hy het een van die katte later in die water gesien swem, maar gelukkig het die dier nie verdrink nie.

Duisende rande se skade is ook by sy bure, Johan en Sarah Jacobs, en ’n derde huis in die kompleks aangerig.

Jacobs en Patricios vermoed die water het by ’n nabygeleë skool se sokkerveld opgedam, waar dit ’n muur omgestoot en toe na hul huise gestroom het en die grensmure voor die vloed gebreek het.

Jacobs was in die kombuis besig om aandete te maak toe die vallende muur ’n glasdeur gebreek het waardeur die water gevloei het.

“Ek het net ’n harde slag gehoor en toe is dit die ene water. Daar was water in kaste, die wasmasjien, twee yskaste en alle ander elektriese toebehore. Die ergste is om die modder uit te kry.”

In ’n stadium was die water tot kniehoogte in die Jacobse se huis.

Donna-Rae Patricios het gesê hulle maak al twee dae lank skoon.

Sy was nie by die huis toe die water daardeur is nie.

Behalwe ou foto’s wat in kaste se laaie was, het hulle geen ander onvervangbare artikels verloor nie.

“Ek gee nie om oor die goed (besittings) wat beskadig is nie, maar is net bly ons lewe,” het mnr. Patricios gesê.

Hoewel al die vertrekke op die grondverdieping oorstroom is, het die Jacobse geen onvervangbare artikels verloor nie.

Jacobs het gesê met al die modder in die huis voel dit asof hulle in ’n dam bly.

“Moeder Natuur het ons net weer gewys wie’s baas. Wat kan ons doen? Die dinge gebeur maar.”

Volgens hom kan hulle nog nie binne begin skoonmaak nie omdat die versekeringsmaatskappy se assessors nog na die skade moet kom kyk.

–Beeld