Vliegtuig maak noodlanding
2010-03-10 16:01
Durban – Die vlieënier van ‘n ligte vliegtuig moes Woensdag ‘n noodlanding maak by Durban se Virginia-lughawe nadat een van sy bande afgeval het, het die polisie gesê.
“Niemand is in die voorval beseer nie en die vliegtuig is nie beskadig nie. Die band het afgeval terwyl die vliegtuig opgestyg het en die vlieënier moes ‘n noodlanding maak,” het supt. Vincent Mdunge, polisiewoordvoerder, gesê.
Daar was geen passasiers aan boord nie.
“Die Burgerlugvaartowerheid is besig om ondersoek in te stel oor hoekom die band afgeval het,” het Mdunge gesê.
- Sapa