Vleisvrye Maandae kom onder skoot
2010-10-31 13:39
Johannesburg - 'n Oorlog dreig oor vleis.
Dr. Pieter Prinsloo, voorsitter van die
Oos-Kaapse Rooivleisprodusentevereniging, het die veldtog Vleisvrye
Maandae, ’n projek wat mense aanmoedig om een dag per week nie vleis te
eet nie, die stryd aangesê.
Prinsloo het ’n klag teen dié veldtog
by die Gesagsvereniging vir Reklamestandaarde (GRS) ingedien – hy meen
dit grens aan wanvoorstelling omdat dit allerlei euwels aan die
plaaslike rooivleisbedryf toedig.
Vleisvrye Maandae is ’n veldtog
wat deur ’n aantal omgewingsorganisasies gesteun word en mense
aanmoedig om elke eerste dag van die week sonder tjops, wors en boudjies
klaar te kom.
Volgens Tammy Fry, woordvoerder van die
veldtog, het die vleisbedryf ’n enorme uitwerking op die omgewing: Dit
verbruik veel meer hulpbronne en veroorsaak veel meer besoedeling as die
verbouing van plantgewasse.
Daarbenewens knou Suid-Afrikaners se
gewoonte om sewe dae per week vleis te eet hul gesondheid – dit het hoë
cholesterol, hartsiektes en diabetes tot gevolg.
Organisasies
soos Animal Rights Africa en Beauty With-out Cruelty het al hul steun
aan dié veldtog toegesê en die Kaapse stadsraad se
gesondheidsdepartement steun dit ook.
Maar Prinsloo, wat die klag teen Vleisvrye Maandae in sy persoonlike hoedanigheid ingedien het, meen vleis is g’n so erg nie.
“Die
aanname dat aardverwarming vererger word deur lewendehawe-boerdery is
nie geldig in ’n land soos Suid-Afrika, wat as ontwikkelende land beskou
word, nie,” skryf hy.
“Ons bevolking is baie meer versprei en ’n groot deel van ons rooivleis word natuurlik geproduseer.”
“Die
veebedryf is die grootste werkverskaffer in landbou en baie mense se
inkomste word deur die veldtog in die gedrang gebring.”
Volgens Prinsloo is dit onwaar dat rooivleis noodwendig sleg is vir mens se gesondheid.
Maar Fry, wat ook bemarkingshoof van die Fry-voedselgroep is, staan by haar veldtog.
“Prinsloo
het geen saak nie,” sê sy. “As jy vir mense sê om minder vleis te eet,
sal jy altyd teenstand kry, maar die feite is aan ons kant.”
Volgens
haar word daar jaarliks 56 miljard diere wêreldwyd geslag om geëet te
word. “Daar is geen manier dat al dié diere op ’n verantwoordelike wyse
aangehou kan word nie.
“Om diere winsgewend te bemark moet hulle vol antibiotika gespuit word en reuse-hoeveelhede water en voer moet verbruik word.
“Verbruikers
word altyd prentjies van gelukkige plaasdiere gewys, maar dit is
beslis nie hoe die diere op ons vleisplase deesdae lyk nie.
“Navorsing
wys as jy een dag per week nie vleis eet nie, het dit ’n positiewer
uitwerking op die omgewing as om na ’n hibridiese motor oor te skakel.”
Op
Vleisvrye Maandag se webblad word beweer as Suid-Afrikaners 15% minder
vleis verbruik, sal die water wat daardeur by slagpale gespaar word 104
000 huishoudings van drinkwater kan voorsien.
Sowat 250 liter water word glo gebruik om 1 kg graan te verbou, terwyl 25 000 liter gebruik word om 1?kg vleis te produseer.
- Rapport