Vlaeberg-brand laat bestryders skarrel
2010-12-07 06:22
Die Burger
Kaapstad - Die eerste groot veldbrand van die seisoen gister teen die hange van Vlaeberg het brandbestryders laat bontstaan terwyl die wind om hulle getier het.
Die brand het om 13:13 uitgebreek en teen die hange bokant Seepunt gewoed.
Altesaam 40 brandbestryders en twee helikopters is ingespan om die brand, wat ’n gebied van 500m by 100m verwoes het, te blus, het Theo Lyne, woordvoerder van die brand-en- reddingsdienste, gesê.
Die oorsaak van die brand is nog onbekend.
Die vlamme is teen 15:30 geblus. Niemand is beseer nie en geen eiendom was in gevaar nie.
Lyne het gesê die gebied sal deur die nag gemonitor word ingeval die berg weer vlamvat. “Daar was ’n sterk wind toe ons probeer het om die brand te blus, maar dit het later gaan lê.”
Daar was gister altesaam 60 veldbrande in die Kaapse metropool.
“Dit is ’n redelike hoë getal vir een dag. Die gemiddelde getal brande vir ’n dag soos vandag (gister) is tussen 40 en 60.”
Die eerste brand is gisteroggend omstreeks 09:00 by die Manrisa-vakansieoord naby Mamre aangemeld. Teen laat gisteraand was brandbestryders nog op die toneel nadat ’n veldbrand omstreeks 14:30 uitgebreek het. Dit is teen 19:30 geblus. Niemand is beseer nie en geen eiendom is beskadig nie.
Die Suid-Afrikaanse Weerdiens het gewaarsku dat toestande wat gunstig is vir die ontstaan en verspreiding van veldbrande vandag in die Kaapse metropool, die Breederiviervallei en die Wynland sal heers.
’n Maksimum temperatuur van 30°C word vir vandag in Kaapstad voorspel, met ’n suidoostewind van 35km/h.
Selfs hoër temperature word in die Boland en aan die Weskus voorspel.
Volg Nuus24 op Twitter.
- Die Burger