Visum vir Dalai ‘onwaarskynlik’
2011-10-02 08:49
Johannesburg – Openbare verset laai op teen die regering se
klaarblyklike besluit om nie die Dalai Lama toe te laat om sy vriend
emeritus-aartsbiskop Desmond Tutu se 80ste verjaardagviering by te woon
nie.
Burgerlike organisasies soos die Nndifuna
Ukwazi-menseregtegroep en die Treatment Action Campaign gaan Maandag ’n
protesvergadering buite die parlementsgebou in Kaapstad hou.
Hulle wil ’n petisie aan die regering oorhandig waarop hulle aandring op ’n visum vir die uitgeweke geestelike leier van Tibet.
Die veldtog word gedryf deur agt burgerlike organisasies, asook Suid-Afrikaanse geestelike leiers.
Tutu
self het die afgelope week die regering se klaarblyklike weiering om
die visum uit te reik met die paswetgewing van die apartheidsera
vergelyk.
Maar dit kan alles te laat wees.
Tutu se verjaarsdagviering is eerskomende Vrydag.
Die
regering weier om te bevestig of te ontken dat hy geswig het voor
Chinese druk om nie aan die Dalai Lama ’n visum te gee nie. Maar dit is
wyd bekend dat China volhard met sy jare lange ekonomiese en politieke
druk op bondgenootlande – waarvan Suid-Afrika een is – om die Dalai Lama
te isoleer.
Die regering sloer al drie maande met die Dalai Lama
se visum-aansoek. So ’n aansoek neem gewoonlik net sowat vyf dae om te
verwerk.
Tenzin Taklha, die Dalai Lama se woordvoerder,
het eergister uit Himachal Pradesh in Noord-Indië gesê dit is dalk reeds
te laat om die Dalai Lama se reisreëlings te tref, al word die visum
môre toegeken.
Intussen het ’n senior regeringsamptenaar egter
aan Rapport se susterkoerant City Press gesê dit is “onwaarskynlik” dat
die Dalai Lama ’n visum sal kry.
Die omstredenheid rondom die
Dalai Lama het die afgelope week toegeneem terwyl adj.pres. Kgalema
Motlanthe op ’n staatsbesoek aan China was.
Clayson
Monyela, woordvoerder van die Suid-Afrikaanse departement van
internasionale betrekkinge en samewerking, het bevestig daar is nog geen
vordering met die aansoek nie.
Thabo Masebe, Motlanthe se
woordvoerder, sê die kwessie is nie op die agenda tydens sy Chinese
besoek nie. Hy sê Motlanthe gaan nie kommentaar lewer nie.
Taklha
sê die Dalai Lama was verbaas deur ’n “gesamentlike protesverklaring”
wat die afgelope week deur die Desmond Tutu-stigting uitgestuur is.
“Ons kantoor het niks gesê nie. Dit is nie met ons bespreek nie.
“In
hierdie stadium kan ons nie ons gevoelens oor die Suid-Afrikaanse
regering uitspreek nie; ons moet eers weet wat die regering besluit.”
Taklha sê uitnodigings van Suid-Afrika stroom steeds in, onder meer om studente in Johannesburg en Stellenbosch toe te spreek.
“Hy is ook gevra om Durban toe te gaan waar hy met die Mahatma Gandhi-toekenning vereer gaan word.”
Tutu en die Dalai Lama is mede-wenners van die Nobel-vredesprys.
Die
Dalai Lama het Suid-Afrika nog net een keer besoek. Dit was tydens die
bewind van nóg ’n Nobel-pryswenner, oudpres. Nelson Mandela.
Ander
bekendes wat na Tutu se makietie genooi is, is onder meer: die
rock-legendes Bono, Carlos Santana en Bob Geldof; Kofi Annan,
voormalige sekretaris van die Verenigde Nasies; oudpres. Jimmy Carter
van die VSA; me. Graça Machel; en die sakeman Richard Branson.
- Rapport