Visser se vonnis ‘getemper met genade’
2010-02-25 06:35
Jeanne-Marié Versluis
Pretoria - Cézanne Visser het haar kuisheid en opvoeding weggegooi en losbandigheid aangegryp.
Die maalkolk van ydellike geluk het haar ingesluk en in die web van onsedelikheid het sy ander meisies betrek en hulle erg getraumatiseer.
Só het waarnemende regter Chris Eksteen gister hier in die Noord-Gautengse hooggeregshof gesê toe hy Visser sewe jaar tronkstraf opgelê het op 11 aanklagte.
Hy het gesê dit kan met veiligheid aanvaar word sy sal nie dié misdade herhaal nie, veral omdat Dirk Prinsloo (haar gewese minnaar wat nou in Belarus in die tronk sit) nie meer deel van haar lewe is nie.
Visser kom uit ’n ouerhuis waar haar belange as jong meisie deur haar ouers hoog geag is, het Eksteen gesê.
Sy het haar bekwaam as advokaat en in ’n “grootmoedige stap” haarself van die rol van advokate laat verwyder.
Eksteen het verwys na dr. Eon Sonnekus, ’n forensiese kriminoloog, se getuienis namens Visser dat sy ’n verswakte wil en emosionele wanbalans gehad het toe sy Prinsloo ontmoet het en meer vatbaar was vir navolging van ’n voorbeeld.
Eksteen het gesê hy kan egter nie uit die oog verloor wat Visser gesê het nie: dat sy die eerste keer iemand gekry het wat haar ondersteun en haar toelaat om ’n keuse te maak.
Eksteen het gesê daar is geen getuienis dat ander vroue by wie Prinsloo betrokke was misdaad gepleeg het weens Prinsloo se mishandeling van hulle nie.
Visser se slagoffers wat in die kinderhuis was, het reeds ’n agterstand gehad en was onbevoorreg omdat hulle nie ouerhuise het nie. Kinderhuise waardeer enige hulp van die publiek.
Visser het duidelik besef kinderhuise sal nie ligtelik instem dat kinders uitgeneem word nie, tensy deur getroude paartjies.
Visser, wat op ’n aanklag van bedrog skuldig bevind is, het haar as Prinsloo se vrou aan die kinderhuise voorgestel.
Daar was “deeglike, berekende beplanning” vir Visser se kontak met die Bramley-kinderhuis en sy het sukses met die bedrog gehad.
Visser het “alle aanvoorwerk” om drie minderjarige meisies te verkry in Prinsloo se afwesigheid gedoen.
“U het die inisiatief geneem om hulle te identifiseer en te kry vir die naweek. Al drie is verkry vir eie gewin.”
Die meisies is “deur u en Prinsloo uitgebuit”.
Al drie meisies het kort ná hul aankoms by die Prinsloo-huis kontak gehad met pornografiese video’s en tydskrifte, Visser en Prinsloo se naakte lywe aanskou, gesien hoe Visser vir Prinsloo orale seks gee en hoe dié twee seks het.
Visser het geweet die meisies word verdowingsmiddels ingegee vir seksdade.
Visser het Prinsloo se leefstyl aangeneem en selfs ná hul inhegtenisneming het sy haar nie van hom gedistansieer nie, het Eksteen gesê.
Hy het haar vonnis ook getemper met ’n “groot mate van genade”, het Eksteen gesê.
- Die Burger