Visagie verruil AWB vir sy eie Geloftevolk
2010-06-10 08:42
Die Burger
Bloemfontein. – Op die AWB se eerste nasionale konferensie ná die dood van Eugène Terre’Blanche is dié organisasie geruk deur die bedanking van sy sekretaris-generaal.
André Visagie, wat ná Terre’Blanche se dood die aanstelling van die nuwe leier betwis het, is vort. Hy bring nou ’n nuwe regse organisasie, genaamd Geloftevolk Republikeine, op die been.
Volgens hom loop heelwat AWB-lede hierheen oor.
Steyn van Ronge, AWB-leier, het Die Burger gister in ’n onderhoud oor Visagie se bedanking ingelig.
Visagie het verlede Saterdag op die AWB se nasionale konferensie op Paardekraal bedank.
“Dit was ’n algehele verrassing, maar die generale staf het dit aanvaar,” het Van Ronge gesê.
Visagie het hom in ’n persoonlike brief van sy redes verwittig, maar hieroor wou Van Ronge nie meer sê nie.
Visagie, van Kimberley, het bevestig dat hy as die AWB se sekretaris-generaal en ook uit die organisasie bedank het.
“Die hoofrede is dat die AWB se tempo onaanvaarbaar is. Dit beweeg te stadig. Ek doen eerder my eie ding in groepsverband elders.”
Hy het gesê ’n stigtingsvergadering vir Geloftevolk Republikeine word vanaand in Brakpan gehou.
Volgens Visagie is voormalige AWB’s wat dié organisasie “vinniger” wou sien beweeg van die nuwe organisasie se lede. Daar is ook ander van buite die AWB.
“Verteenwoordigers van sowat 40 dorpe in 14 streke, insluitend Kaapland, Vrystaat en Transvaal, woon die vergadering by.”
’n Demokratiese leiersverkiesing vind later plaas. Intussen tree hy as tussentydse leier op, terwyl tussentydse streekleiers ook aangewys is.
’n Formele stigtingsvergadering behoort in die volgende drie weke plaas te vind.
Visagie was ná Terre’Blanche se dood betrokke in die “Don’t touch me on my studio”-onderonsie tydens ’n regstreekse televisie-onderhoud in e.tv se ateljee. Hy het daarna uitgestorm.
Sy pleidooi in daardie tyd was vir wraak. Hy is hieroor deur Van Ronge gerepudieer.
Volg Nuus24 op Twitter
- Die Burger