Virgin Active by tweede rasse-voorval betrek
2012-02-07 18:00
Kaapstad – Volgens berigte deur Eyewitness News is nog ‘n Virgin Active-gimnasium by ‘n rasse-voorval betrokke, het iol Dinsdag berig.
Die beweerde aanval het in Sunninghill in die noorde van Johannesburg plaasgevind en Lesley Mofokeng, die slagoffer in die voorval, sê hy is te bang om terug te keer na die gimnasium.
Mofokeng het glo reeds ‘n kriminele klag by die Sandton-polisiestasie ingedien.
Volgens berigte het Mofokeng op ‘n oefenfiets gery toe ‘n man hom genader het en daarvan beskuldig het dat hy die toerusting te lank gebruik. Die man het glo op hom gevloek en na hom as ‘n “boy” verwys.
“Die man het gekom en begin skree en het gesê: ‘Julle swart ouens neem alles. Ons weet dit is julle f*kken land, maar julle hoef nie alles te beheer nie.’”
Mofokeng was nog nie weer terug by die gimnasium nie.
Richard Branson, eienaar van die Virgin-groep, het op Facebook kommentaar gelewer aan Virgin Active SA oor die voorval.
“Ons verskoon nie enige vorm van diskriminasie by Virgin – veral rassisme – nie. Ons neem hierdie voorval baie ernstig op en beplan om self na al die feite te kyk sodat die regte uitkoms bereik kan word vir alle betrokke partye,” het hy op Facebook geskryf.
“Ross Faragher-Thomas, Virgin Ative Suid-Afrika se besturende direkteur, ondersoek die voorval persoonlik en vergader volgende week met die twee lede om seker te maak dat ons na die feite kyk en dat ons regverdig is teenoor almal wat betrokke is.”
“Ons beplan om by die kern van hierdie voorval uit te kom en ek wil herhaal dat ons nie enige vorm van vooroordeel sal verdra nie.”
– Lees die volle berig by iol en lees Branson se reaksie op Facebook hier.
– Volg Nuus24 op Twitter
