Vigsdeurbraak vir SA navorsers
2010-07-21 06:58
Die Burger
Durban - Suid-Afrikaanse vigsnavorsers is staande toegejuig toe ’n deurbraak Dinsdag bekend gemaak is met ’n jel wat MIV-oordrag onder vroue kan halveer.
Na raming kan dié jel binne drie jaar keer dat 2,5 miljoen vroue in 73 arm lande met MIV besmet word.
In die 29 jaar van die MIV/vigs-epidemie is hierdie die eerste middel spesifiek vir vroue wat die oordrag van die virus kan keer.
Elf anti-mikrobiese middels is al getoets vir dié doel, maar hierdie jel is die eerste wat slaag.
“In die loopbaan van ’n wetenskaplike word só ’n deurbraak net een keer in ’n leeftyd gemaak,” het dr. Koleka Mlisana van die Universiteit van KwaZulu-Natal (UKZN) gesê.
Die jel bevat 1% tenofovir, ’n antiretrovirale middel wat dikwels in kombinasie met ander soortgelyke medisyne toegedien word om vigs te behandel.
Die jel word met ’n buis binne 12 uur vóór en 12 uur ná seks toegedien.
Die meeste van die mans met wie die vroue in die studie seks gehad het, kon geen verskil voel nie.
Tenofovir word deur die vel opgeneem.
Altesaam 889 vroue van ’n plattelandse gemeenskap en van Durban het aan die drie jaar lange studie deelgeneem.
Dit het getoon dat die jel 39% effektief was om MIV-oordrag te voorkom en 51% om te keer dat die vroue genitale herpes (HSV-2) opdoen.
Uit die 98 vroue wat tydens die studie met die MI-virus besmet is, was 38 uit die groep wat die tenofovir-jel gebruik het en 60 uit die kontrolegroep.
Indien die tenofovir-jel vir langer as ’n jaar gebruik word en minstens 80% van die kere dat die vroue seks het, word die doeltreffendheid van die middel tot 54% verbeter.
Veral weens trekarbeid en jong vroue se onvermoë om veilige seks met hul bedmaats te beding, is vroue in Afrika suid van die Sahara die kwesbaarste groep om met dié dodelike virus besmet te word.
Prof. Salim Abdool Karim en sy vrou, Quarraisha, wat aan die hoof van die projek gestaan het, is Dinsdag by die Wêreld-vigskonferensie in Wene, Oostenryk, staande toegejuig toe die deurbraak bekend gemaak is.
Die bevindings van hierdie studie kan moontlik binne twee tot drie jaar onafhanklik bevestig word.