Vigs kán en sál oorwin word, sê Zille
2010-12-02 09:22
Kaapstad - “Vigs is ’n siekte wat oorwin kan word. Ons móét dit oorwin en ons sál dit oorwin.”
Dít was Donderdag op Wêreldvigsdag Helen Zille, DA-leier en premier van die Wes-Kaap, se boodskap aan die inwoners van Khayelitsha.
“Dit is belangrik vir die gesondheid van al ons mense (dat vigs oorwin word). Kinders moet met ouers grootword, nie as wesies nie.
“Dit is ook belangrik vir Suid-Afrika, want ons is ’n ontwikkelende land en het nie geld om te bestee aan goed wat ons kan voorkom nie. Ons het baie geld wat ons aan ontwikkeling moet bestee, maar as ons iets kan voorkom, moet ons dit net doen.”
Zille het haar by dié geleentheid vir die virus laat toets.
Priya Reddy, haar woordvoerder, het later aangedui dat Zille nie haar status bekend gaan maak nie.
“Sy wou net hê mense moet besef hoe belangrik dit is om hul status te weet sodat die virus nie verder versprei nie.”
Die premier het die belangrikheid van vennootskappe in die stryd teen vigs beklemtoon.
Volgens haar het almal ’n verantwoordelikheid om die verspreiding van die siekte te voorkom. “Die regering moet klinieke beskikbaar stel, asook kon- dome, medikasie en gratis toetse, maar die regering kan nie op sy eie die verspreiding van MIV stop nie. Dit moet ’n vennootskap met die gemeenskap wees.”
Raadslid James Vos, voorsitter van die Kaapse stadsraad se gesondheidskomitee, het gesê die raad het ’n greep gekry op die virus in Khayelitsha.
Die stadsraad het sy teiken van 12% vir die boekjaar vir 2009-’10 vir MIV-toetse op mense ouer as 15 jaar met 2% oortref.
’n Totaal van 324326 toetse is gedoen.
“Alle gesondheidgeriewe van die stadsraad in Khayelitsha verskaf MIV-sorg. Meer as 17000 mense in Khayelitsha alleen kry tans antiretrovirale behandeling.
“Gedurende die eerste drie maande van die jaar is 583 babas gebore wie se ma’s MIV-positief was en behandeling ontvang. Agttien, of 3,1%, van die babas was met die virus besmet. Hulle is onmiddellik op behandeling geplaas.”
Volg Nuus24 op Twitter.