Vigs-advertensie uit SA met gesogte prys vereer
2010-08-01 16:05
Johannesburg - Van ’n lewende geraamte tot springlewendig in net drie maande.
Selinah Phungwayo, ’n MIV/vigslyer van Mpumalanga, is steeds terminaal siek aan dié virus.
Maar TV-kykers wêreldwyd kon in hul sitkamers beleef hoe Phungwayo se gesondheid en lewensgehalte dramaties verbeter danksy antiretrovirale middels (ARM).
En nou is die aangrypende TV-advertensie waarvan Phungwayo die ster is met goud vereer op die onlangse Cannes Lion-bemarkingsfees in Frankryk. Dit is die eerste keer in 11 jaar dat ’n Suid-Afrikaanse bemarkingsveldtog die gesogte eerste plek behaal.
Maar die ware wenner is Phungwayo.
Sy was net sowat drie weke weg van die dood toe sy haar eerste dosis vigsmedikasie geneem het. Dié oomblik is op video verewig deur die Johannesburgse bemarkingsmaatskappy Ogilvy en die produksiemaatskappy Egg.
Dit was die eerste toneel van die produksie wat oor ’n tydperk van drie maande geskiet is en wat dokumenteer hoe Phungwayo bykans daagliks sterker en gesonder word danksy die medikasie.
Die advertensie is vervaardig in opdrag van die Topsy-stigting, ’n nie-regeringsorganisasie wat hulle beywer om MIV/vigslyers te help.
“Die uitwerking van vigs kán omgekeer word met ARM,” vertel Silvia de Jager, uitvoerende hoof van Topsy.
“Phungwayo bewys dit in die advertensie en dit vertel ook die verhaal van duisende ander mense op ARM.”
Hoewel ARM nie vigs genees nie, kan dit gebruikers daarvan se lewensgehalte drasties verbeter.
De Jager sê danksy die bewusmakingsveldtog is Topsy oorval met geldskenkers en mense wat hulle vir MIV/vigs wil laat toets.
“Phungwayo is een van ons grootste ambassadeurs.”
Die advertensie is vroeër vanjaar twee maande lank op verskeie DStv-kanale en in Nu Metro-teaters vertoon.
Op YouTube het die advertensie bykans 30 000 trefslae gelok. Phungwayo se verhaal was ook ’n sensasie by verlede week se internasionale vigskonferensie in Wene, Oostenryk, waar 25 000 mense die advertensie gesien het.
Topsy hoop die advertensie sal help om die stigma rondom vigs te verwyder, bewusmaking oor die voordele van ARM bevorder en verhinder dat mense hulle uit onkunde tot kwaksalwers wend.
- Rapport