Vigs: Mbeki moet jammer sê
2009-12-01 06:29
Cobus Coetzee
Johannesburg - Oudpres. Thabo Mbeki moet jammer sê oor sy hantering van die MIV/vigs-pandemie.
So het Zwelinzima Vavi, hoofsekretaris van Cosatu, Maandag op die vooraand van Wêreldvigsdag in Johannesburg geëis.
Vavi se uitsprake volg op die Young Communist League (YCL) se beroep om Mbeki weens volksmoord aan te kla omdat die YCL meen sy regering het versuim om die pandemie te stuit.
“Eintlik het 350 000 mense in daardie (Mbeki se) periode gesterf. Die Ellispark-stadion kan ses keer (met die sterftes) gevul word. Dit was die skaal van sy ontkenning en gebrek aan optrede deur die regering,” het Vavi gesê.
Volgens hom het Cosatu in 2006 en 2007 op leiersvlak oorweeg om Mbeki in die hof van “volksmoord” aan te kla, maar sedertdien daarteen besluit.
“Ons dink nie ons moet daardie haas jaag nie,” het Vavi gesê.
“Ons is nie geïnteresseerd in ’n Nuerenberg-verhoor nie.”
Hy meen Mbeki se hantering van die MIV/vigs-pandemie is ’n “baie ongelukkige bladsy” in die land se geskiedenis en “dié bladsy behoort tot die verlede”.
Cosatu glo Mbeki behoort “die eerbare ding te doen”, te erken hy was verkeerd en om verskoning te vra.
“Veral vir die lyding van die mense wat in daardie tydperk dood is,” het Vavi gesê.
Mnr. Mukoni Ratshitanga, Mbeki se woordvoerder, het gister aan Beeld gesê die oudpresident sal nie vandag op Wêreldvigsdag enige seremonie oor die virus hier bywoon nie.
“Hy is in Addis Abeba (in Ethiopië) vir ’n vergadering oor Darfoer,” het hy gesê.
Volgens Ratshitanga weier Mbeki om kommentaar te lewer op die beskuldigings teen hom.
Hy het gesê hy en Mbeki het nog nooit oor die moontlikheid van openbare toetse vir MIV/vigs gesels, óf oor sy regering se hantering van die pandemie nie.
Vavi het gesê hulle “is verlig en tevrede” om uiteindelik ’n regering te hê wat “bereid is om die stryd teen die pandemie van voor te lei”. “Ons het selfs ’n president wat homself in die openbaar vir MIV sal laat toets.”
* Mbeki het in sy biografie, Thabo Mbeki The Dream Deferred, teenoor die skrywer Mark Gevisser ontken dat hy ’n vigsontkenner is.
- Beeld