Vier vas vir moord op jong vrou

2012-10-12 18:00

Durban – Vier mans is Vrydag in hegtenis geneem nadat 'n vrou in KwaMashu, noord van Durban, doodgeskiet is, het die polisie in KwaZulu-Natal gesê.

"Die verdagtes is in Inanda vasgetrek. Hulle sal van moord en drie aanklagte van poging tot moord aangekla word," het kolonel Jay Naicker gesê.

Cebisile Shezi (31), wat 'n IFP-hemp gedra het, is Saterdag naby die Thembalihle-treinstasie in KwaMashu geskiet.

In 'n aparte voorval het 'n koeël 'n vrou skrams in die gesig getref en is sy deur die polisie na die hospitaal geneem.

Shezi is geskiet nadat die polisieminister, Nathi Mthetwa, lede van die Inkatha Vryheidsparty toegespreek het.

Mthetwa het hulle gevra om kalm te bly nadat een van die party se raadslede ontvoer is.

Volg Nuus24 op Twitter.

- SAPA