Vier vas oor kitsbank-ontploffings

2012-12-03 14:32

Kaapstad – Vier mans is in die Paarl in die Wes-Kaap in hegtenis geneem in verband met kitsbank-ontploffings, het die polisie in die Wes-Kaap gesê.

Lt. kol. Andrè Traut het gesê die mans, tussen die ouderdomme van 21 en 37, is omstreeks 02:40 by hul huis in Mbekweni in hegtenis geneem.

Traut het gesê kommersiële plofstof, twee onwettige vuurwapens en polisie-uniforms is in die mans se besit gevind en die polisie het beslag gelê op 'n wit VW-minibus.

Hy het gesê die ondersoek is in 'n sensitiewe stadium en kon nie sê met hoeveel kitsbank-ontploffings die groep verbind word nie. Traut kon ook nie sê of nóg mense in hegtenis geneem gaan word nie.

Minstens 20 kitsbanke is sedert die begin van die jaar in die provinsie opgeblaas.

– Volg Nuus24 op Twitter

- SAPA