Vier sterf toe sinkhuise brand
2011-09-05 18:58
Kaapstad – Vier mense, insluitende ‘n driejarige meisie, het gesterf toe sinkhuise aan die brand geslaan het in Kuilsrivier, het die Stad Kaapstad Maandag gesê.
Die brand het by die Vrygrond-nedersetting uitgebreek kort voor 01:00 Sondag, het Wilfred Solomons-Johannes, rampbestuur-woordvoerder, gesê.
“’n Argument onder sommige inwoners het vermoedelik tot die brand gelei, maar geen besonderhede is nog daaroor beskikbaar nie.”
Brandbestryders het daarin geslaag om die brand te blus nadat 50 sinkhuise reeds afgebrand het. Tot 213 mense is dakloos gelaat.
Die stad voorsien hulle van kos, komberse en klere. Materiaal om hul huise mee te herbou, word ook aan hulle geskenk.
- Volg Nuus24 op Twitter
- SAPA