Heli-ongeluk: Top-polisie sterf
2010-07-23 10:30
Johannesburg – Dit het aan die lig gekom dat vyf top-polisiebeamptes en twee vlieëniers Vrydagoggend omstreeks 09:00 gesterf het toe ‘n helikopter sowat 5km buite Witbank neergestort het, het Eyewitness News berig.
Intussen word berig dat die helikopter een van twee was wat Vrydagoggend na Witbank ontbied is om die plaaslike polisie te help toe gewapende rowers ‘n plaaslike supermark beroof het en die verdagtes in die gebou se dak vasgekeer is.
Volgens Chris Botha, Netcare 911-woordvoerder, was daar sewe mense aan boord van die helikopter ten tyde van die voorval.
“Die polisie is op die toneel en besig om ondersoek in te stel,” het Botha gesê.
Na bewering het die helikopter aan die brand geslaan, wat die uitkenning van passasiers bemoeilik.
Geen verdere inligting is bekend nie.
Volg Nuus24 op Twitter.
- Nuus24