Vier sterf in twee ongelukke in Oos-Kaap
2011-12-31 15:00
Johannesburg – Vier mense is Saterdag in twee aparte padongelukke in die Oos-Kaap dood, het amptenare gesê.
In die een ongeluk is twee mense dood en vyf beseer toe ‘n motor Saterdagoggend van die R61 tussen Ngcobo en Mthatha van die pad afgegaan en verskeie kere gerol het, het die Oos-Kaap se provinsiale woordvoerder vir verkeer Tshepo Machaea gesê.
Hy het gesê die bestuurder het beheer verloor in swaar reën.
Die beseerdes is na die Nelson Mandela Akademiese Hospitaal geneem vir behandeling.
In ‘n ander voorval is twee mense dood en een persoon beseer op die R63 tussen Hogsback en Alice nadat ‘n motor omgeslaan het.
Machaea het gesê die ongeluk het omstreeks 05:30 plaasgevind.
Die beseerde persoon is na die Victoria Hospitaal in Alice geneem vir behandeling.
Machaea het gesê bestuurders moet versigtig bestuur, aangesien dele van die Oos-Kaap baie nat paaie kan verwag oor die res van die naweek.
– Volg Nuus24 op Twitter
- SAPA