Vier se skietdood in kroeg ‘slagting’
2010-09-30 07:46
Durban. – Die skietery in ’n kroeg in die stad wat die lewe van vier mense geëis het, was “niks minder nie as ’n slagting”.
So het waarnemende regter Guido Penzhorn gister in die hooggeregshof gesê toe hy die eertydse polisiemanne Brian (41) en Leon Steven (36) vir onderskeidelik 25 en 20 jaar tronk toe gestuur het.
Hulle het die publiek se vertroue dat die polisie hulle sal beskerm, geskend toe hulle op ongewapende mense in die kroeg losgebrand het, het Penzhorn gesê.
Die skietery die aand van 10 September 2008 in die Merseyside Pub and Tavern in Umbilo is voorafgegaan deur ’n tergery oor penisgrootte wat op ’n rassevoorval uitgeloop het.
Penzhorn het die Steven-broers se optrede as afskuwelik en gevoelloos bestempel en gesê hulle het nie ’n sweempie berou getoon nie.
Drie mans – Rory Menzies (40), Shawn Strydom (32) en Nico Jansen van Rensburg (47) – is op slag dood toe die Steven-broers ná ’n bakleiery op die parkeerterrein die kroeg se deur oopgedwing en op ’n kort afstand op mense losgebrand het. Bruce Edwards (57) is ’n paar dae later in die hospitaal dood.
Sy seun, Shaun (30), is gewond.
Penzhorn het Brian Steven tot 25 jaar tronkstraf weens elk van die moorde en 15 jaar op aan-klag van poging tot moord gevonnis.
Sy broer, wat ’n mindere rol in die skietery gespeel het, is tot 20 jaar tronkstraf weens elk van die moorde en 10 jaar weens poging tot moord gevonnis.
Albei sal hul vonnisse gelyk-lopend uitdien.
Penzhorn het gelas dat hulle twee derdes van hul tronkstraf moet uitdien voordat hulle vir parool in aanmerking mag kom.
Die regter het tydens vonnisoplegging gesê hy het in ag geneem dat die Steven-broers gebelg kon gevoel het omdat hul neef glo ’n “k*****” genoem is.
Penzhorn het verlof om appèl teen die skuldigbevinding en vonnis toegestaan, maar ’n aansoek van die hand gewys dat die broers op borgtog vrygelaat word hangende die aansoek.
Familielede van die oorledenes het die vonnis verwelkom. Me. Marie Corbett, Menzies se ma, het gesê sy het die afgelope twee jaar?“?’n stadige dood gesterf.” “Nou kan ek begin om uit daardie diep, donker gat te klim.”
Lee Anne Mill, wat agt jaar lank met Strydom uitgegaan het, het vertel hoe sy die wêreld vol gaan reis het om van haar kêrel se dood weg te kom.
“Ek voel verlore,” het mev. Ruth Moses, die beskuldigdes se ma, gesê.
“Godvresend grootgemaak ... ” Mev. Ruth Moses, die beskuldigdes se ma, vertel hoe die saak haar getref het.
Lee Anne Mill het die wêreld vol gaan reis omdat sy nie die dood van mnr. Shawn Strydom, haar kêrel, kon verwerk nie. By haar is mnr. Craig Kurland, sy beste vriend.
“’n Diep, donker gat ... ” Marie Corbett praat gister oor die dood van mnr. Rory Menzies, haar seun.
- Beeld