Vier moorde, twee verkragtings in Noordwes

2012-07-10 08:45

Johannesburg – Vier moorde en twee verkragtings is die afgelope naweek in die Noordwes aangemeld, het die polisie gesê.

Kapt. Pelonomi Makau sê ‘n 22-jarige man is in Khuma doodgesteek nadat hy ‘n nagwaak verlaat het om ‘n sigaret te gaan koop.

Makau sê die man se lyk is in die straat gevind. Dit blyk dat hy deur ‘n bende in die woonbuurt vermoor is.

‘n Tweede man (27) is met ‘n mes in Vryburg doodgesteek. Hy is aangeval terwyl hy saam met ‘n vriend van ‘n kroeg terug huis toe gestap het.

‘n Drie-en-twintig-jarige man is tydens ‘n onderonsie in ‘n sjebeen doodgesteek. Sy aanvaller het hom in die kop, bors en linkerskouer gesteek.

Makau sê ‘n 22-jarige man is in die bors gesteek terwyl hy in Kanana terug huis toe gestap het. Hy is aangeval toe hy geweier het om vuurhoutjies vir ‘n man te gee.

Makau het bygevoeg dat ‘n 12-jarige meisie by haar huis in Madikwe verkrag is. ‘n Man het deur ‘n venster by haar slaapkamer ingebreek.

In Boitekong is ‘n 22-jarige vrou deur haar 28-jarige oom in die familiehuis verkrag.

“Haar ma was nie tuis ten tyde van die verkragting nie,” het Makau gesê.

Die polisie het later die man in hegtenis geneem.

Volg Nuus24 op Twitter

- SAPA