Vier met ongelisensieerde vuurwapens vas
2010-09-06 19:53
Johannesburg – Vier mans is Maandag in Tembisa in hegtenis geneem vir die besit van ongelisensieerde vuurwapens, het polisie in Gauteng gesê.
Die groep, wat tussen die ouderdomme van 18 en 23 is, was ook in besit van ‘n polisie-uniform, polisiewapen en ‘n masjien wat gebruik word om inligting op die magnetiese strokie van kredietkaarte te kopieer, het kapt. Manyadza Ralizhivha in ‘n verklaring gesê.
Polisie het hulle in Endulwini in Tembisa in hegtenis geneem nadat ‘n plaaslike inwoner hulle ingelig het dat een van die mans in besit van ‘n onwettige vuurwapen is.
Die eerste man is slegs met ‘n pistoolsak gevind en hy het toe ‘n ander man geïdentifiseer as die een wat die vuurwapen wegsteek
Die twee het gevolglik hulle ‘vriende’ uitgewys wat ook in besit van vuurwapens was.
Een van die mans was ook in besit wan ‘n blou polisielig, polisiehemp en -wapen.
‘n Vierde man het ‘n ongelisensieerde geweer gehad, sowel as ‘n kredietkaartmasjien.
Polisie het die plaaslike inwoners aangemoedig om voort te gaan om vir hulle inligting oor misdaad in die area te gee.
‘n Ondersoek is geloods om vas te stel of die vier met ander misdade verbind kan word.
Volg Nuus24 op Twitter
- SAPA