Vier mans in Kaapstad vas oor perlemoen

2012-09-23 20:30

Kaapstad – Vier mans is in Nomzamo naby Strand in hegtenis geneem nadat perlemoen in hul besit gevind is, het die polisie in die Wes-Kaap Sondag gesê.

Kapt. Frederick van Wyk, polisiewoordvoerder, het gesê die vier mans was Vrydag besig om die perlemoen in 'n plakkershut te tel toe die polisie op hulle toesak.

"Die polisie het beslag gelê op 2 026 eenhede perlemoen wat in plastieksakke gestoor was."

Die mans, tussen die ouderdomme van 18 en 33, sal na verwagting Dinsdag in die Strand-landdroshof verskyn.

Dít was die tweede perlemoenvonds wat die polisie Vrydag in die Wes-Kaap gemaak het.

Die polisie het vroeër daardie dag 'n verdagte voertuig op die Salmonsdam-grondpad naby die Modderrivier-plaas in Stanford gesien.

Van Wyk het gesê die polisie het die voertuig agternagesit en later op die verlate voertuig in die bosse afgekom.

Die voertuig is deursoek en verskeie sakke met perlemoen is gevind.

Van Wyk het gesê nóg 'n voertuig met 'n papwiel is langs die pad naby die eerste voertuig gevind.

"'n Polisiehond het positief reageer en die voertuig is oopgemaak."

Verskeie swartsakke met 8 087 eenhede perlemoen is in die voertuig gevind.

Niemand is in hegtenis geneem nie en die polisie ondersoek die saak.
      
– Volg Nuus24 op Twitter

- SAPA